مشرقِ وسطیٰ میں بڑھتی ہوئی جنگی صورتحال کے اثرات پاکستان سٹاک ایکسچینج پر بھی نمایاں ہونے لگے ہیں، جہاں کاروباری ہفتے کے پہلے روز شدید مندی دیکھی گئی۔
کاروبار کے دوران 100 انڈیکس میں 4687 پوائنٹس کی بڑی کمی ریکارڈ کی گئی، جس کے بعد انڈیکس گر کر 1 لاکھ 49 ہزار 178 پوائنٹس کی سطح پر آ گیا۔
ماہرین کے مطابق مشرقِ وسطیٰ میں جاری جنگی کشیدگی اور عالمی سطح پر غیر یقینی معاشی صورتحال کے باعث سرمایہ کار محتاط ہو گئے ہیں، جس کے نتیجے میں مارکیٹ میں فروخت کا دباؤ بڑھ گیا۔
مارکیٹ تجزیہ کاروں کا کہنا ہے کہ خطے میں جاری کشیدگی کے اثرات عالمی مالیاتی منڈیوں پر بھی پڑ رہے ہیں، جبکہ پاکستان اسٹاک مارکیٹ میں بھی سرمایہ کاروں نے محتاط حکمت عملی اختیار کرتے ہوئے حصص کی فروخت کو ترجیح دی۔
دوسری جانب ماہرین کا کہنا ہے کہ اگر عالمی اور علاقائی صورتحال میں بہتری آتی ہے تو مارکیٹ میں دوبارہ استحکام آنے کا امکان ہے، تاہم فی الحال سرمایہ کار صورتحال پر گہری نظر رکھے ہوئے ہیں۔
