پاکستان اسٹاک ایکسچینج میں نئی تاریخ رقم ہو گئی، جہاں 100 انڈیکس پہلی بار ایک لاکھ 86 ہزار پوائنٹس کی حد عبور کر گیا۔
کاروباری ہفتے کے پہلے روز مارکیٹ میں زبردست تیزی دیکھی گئی اور 100 انڈیکس میں 2147 پوائنٹس کا نمایاں اضافہ ریکارڈ کیا گیا۔
کے ایس ای ویب سائٹ کے مطابق ہنڈرڈ انڈیکس اس وقت ایک لاکھ 87 ہزار 246 پوائنٹس کی سطح پر پہنچ چکا ہے۔ ماہرین کے مطابق اسٹاک مارکیٹ میں یہ مثبت رجحان سرمایہ کاروں کے معیشت اور کاروباری سرگرمیوں پر بڑھتے ہوئے اعتماد کا اظہار ہے۔
دوسری جانب کرنسی مارکیٹ میں بھی معمولی بہتری دیکھنے میں آئی، جہاں امریکی ڈالر کی قدر میں 2 پیسے کی کمی واقع ہوئی۔ انٹر بینک مارکیٹ میں ایک امریکی ڈالر 280 روپے 03 پیسے میں دستیاب ہے۔
ماہرین کا کہنا ہے کہ معاشی اشاریوں میں بہتری اور سرمایہ کاروں کے اعتماد میں اضافہ ملکی معیشت کے لیے خوش آئند اشارہ ہے۔
