بنوں کے علاقے ایف سی لائن دریوبہ پر دہشت گردوں کی جانب سے کواڈ کاپٹر ڈرون کے ذریعے حملہ کیا گیا، جس کے نتیجے میں فرنٹیئر کور (ایف سی) کے آٹھ اہلکار زخمی ہوگئے۔
پولیس کے مطابق دہشت گردوں نے ڈرون کے ذریعے ایف سی لائن پر چار گولے گرائے، جس سے علاقے میں خوف و ہراس پھیل گیا۔ زخمی اہلکاروں کو فوری طور پر قریبی ہسپتال منتقل کر دیا گیا جہاں انہیں طبی امداد فراہم کی جا رہی ہے۔
زخمیوں میں نائب صوبیدار عبدالرشید اور حکیم شاہ شامل ہیں، جبکہ دیگر زخمی سپاہیوں میں خاکم خان، ابرار، طارق، ساجد، اعظم اور حوالدار آصف شامل ہیں۔
حملے کے بعد ایف سی اہلکاروں نے فوری جوابی کارروائی کرتے ہوئے ڈرون پر فائرنگ کی، تاہم ڈرون واپس چلا گیا۔ واقعے کے بعد سکیورٹی مزید سخت کر دی گئی ہے اور علاقے میں سرچ آپریشن شروع کر دیا گیا ہے۔
