وفاقی دارالحکومت اسلام آباد سمیت خیبر پختونخوا کے بیشتر علاقوں میں وقفے وقفے سے بارش کا سلسلہ جاری ہے جس کے باعث موسم خوشگوار ہو گیا ہے۔
ملک میں مغربی ہواؤں کے نئے سسٹم کے داخل ہونے کے بعد بارشوں کا ایک نیا سلسلہ شروع ہوا ہے۔ خیبر پختونخوا کے ہزارہ، ملاکنڈ، مردان اور پشاور ڈویژنز میں تیز ہواؤں کے ساتھ بارش ریکارڈ کی گئی، جبکہ کوہاٹ، بنوں، کرک، لکی مروت اور ڈیرہ اسماعیل خان میں بھی مختلف مقامات پر بارش ہوئی۔
اسی طرح شمالی و جنوبی وزیرستان، کرم، مہمند اور باجوڑ کے علاقوں میں بھی بارش ہوئی جس سے موسم مزید خوشگوار ہو گیا۔
دوسری جانب کشمیر، گلگت بلتستان، پنجاب اور بلوچستان کے مختلف علاقوں میں بھی بارش کا سلسلہ جاری رہا۔ بلوچستان کے آواران، مسلم باغ، پشین، کوئٹہ اور خضدار سمیت کئی علاقوں میں وقفے وقفے سے بارش ہوئی، جبکہ راولپنڈی، خطہ پوٹھوہار، لاہور اور گوجرانوالہ میں بھی بارش ریکارڈ کی گئی۔
محکمہ موسمیات کے مطابق بارشوں کا یہ سلسلہ 31 مارچ تک جاری رہنے کا امکان ہے۔
مزید برآں پی ڈی ایم اے نے ممکنہ ناخوشگوار واقعات سے بچاؤ کے لیے تمام متعلقہ اداروں کو الرٹ رہنے کی ہدایات جاری کر دی ہیں۔
