خیبرپختونخوا اور اسلام آباد سمیت ملک کے مختلف شہروں میں مون سون بارشوں کا سلسلہ جاری ہے، پنجاب میں بارشوں کے دوران مختلف واقعات میں 6 افراد جاں بحق اور 25 زخمی ہوگئے ۔
خیبرپختونخواکے ضلع مردان، شمالی وزیرستان میں بھی گرج چمک کے ساتھ بارش ہوئی، جنوبی وزیرستان میں گزشتہ روز کی طوفانی بارش سے جامع مسجد کی چھت گر گئی، کچھ گھروں اور دکانوں کو بھی نقصان پہنچا ۔
قصور کی تحصیل چونیاں میں بارش کے دوران افسوسناک واقعہ پیش آیا جہاں چھت گرنےسے 2 بچیوں کی اموات ہوئیں جبکہ بہاولنگر میں بھی کچے مکان کی چھت گرنے سے 4 سالہ بچہ جاں بحق ہوگیا ۔
اسلام آباد اور راولپنڈی میں بارش سے موسم خوشگوار ہوگیا تاہم اربوں روپے کی لاگت سے بننے والی اسلام آباد ہائی کورٹ کی عمارت کی تعمیر 2 سال بعد ہی بارش میں ٹپکنے لگی ۔
دوسری جانب پی ڈی ایم اے خیبرپختونخوا نے صوبے کے بیشتر اضلاع میں آج سے یکم جولائی تک شدید بارشوں کا کی پیشنگوئی کرتے ہوئے کہا ہے کہ صوبہ کے بعض اضلاع میں موسلادھار بارش اور ژالہ باری کا بھی امکان ہے ۔
پی ڈی ایم اے کے مطابق بارشوں کے باعث صوبہ کے شمالی علاقہ جات میں موجود گلیشیئرز پھٹنے کا بھی خدشہ ہے ،حساس اضلاع چترال اپر اور لوئر، دیراپر،سوات اور کوہستان کی ضلعی انتظامیہ کو پیشگی اقدامات کے لیے الرٹ جاری کیا گیا ہے ۔
ترجمان پی ڈی ایم اے کے مطابق کسی بھی نا خوشگوار واقعے سے پیشگی نمٹنے کے لیے متعلقہ انتظامیہ کو فوری اقدامات اٹھانے کی ہدایت کی گئی ہے ۔
