سعودی عرب نے فلسطین کیلیے اقوام متحدہ کے امدادی ادارے کو 40ملین ڈالرز امداد دینے کا اعلان کردیا
غیر ملکی خبررساںادارے کے مطابق سعودی امدادی ادارے نے اعلان کیا ہے کہ وہ غزہ میں ڈھائی لاکھ سے زائد افراد کے لیے کھانا اور 20ہزار فیملیز کے لیے ٹینٹ فراہم کرے گا۔ سعودی عرب کی جانب سے یہ اعلان اقوام متحدہ کی ایجنسی کو فنڈز کی کمی پیش آنے کے بعد کیا گیا ہے جب کہ کئی مغربی ممالک کی جانب سے اقوام متحدہ کے امدادی ادارے کی فنڈنگ روک دی گئی ہے۔میڈیا رپورٹس میں بتایا گیا ہے کہ کئی عالمی امدادی گروپوں نے ایک خط پر دستخط کیے ہیں جس میں یورپی ملکوں سے اقوام متحدہ کے امدادی ادارہ برائے فلسطین کے لیے امداد بحال کرنے کا مطالبہ کیا گیا ہے۔
دوسری جانب غزہ میں گزشتہ 24گھنٹوں کے دوران اسرائیلی حملوں میں 100سے زائد فلسطینی شہید ہوگئے۔علاوہ ازیں اسرائیلی فوج نے الشفا اسپتال کو خالی کرنے کی وارننگ جاری کردی ہے۔الجزیرہ کی رپورٹ کے مطابق اسرائیلی فوج نے الشفا میں پناہ لینے والے بے گھر لوگوں کو خبردار کیا ہے کہ وہ فوری طور پر الشفا میڈیکل کمپلیکس کو خالی کردیں بصورت دیگر اس پربمباری کی جائے گی۔ادھر اسرائیلی فوج نے سینٹرل غزہ کے نصیرت کیمپ میں ایک گھر پر حملہ کیا جس کے نتیجے میں 9فلسطینی شہید ہوگئے جب کہ شمالی ساحلی پٹی کی طرف ایک رہائشی بلڈنگ کو بھی نشانہ بنایا گیا۔
