وزیراعظم پاکستان محمد شہباز شریف نے اس عزم کا اعادہ کیا ہے کہ پاکستان امریکا اور ایران کے درمیان مذاکرات کو آگے بڑھانے اور خطے میں پائیدار امن و استحکام کے لیے اپنی سفارتی کوششیں جاری رکھے گا۔
جدہ میں سعودی ولی عہد شہزادہ محمد بن سلمان سے طویل ملاقات کے بعد وزیراعظم نے سماجی رابطے کی ویب سائٹ ایکس (سابقہ ٹوئٹر) پر اپنے پیغام میں بتایا کہ دونوں رہنماؤں کے درمیان باہمی دلچسپی کے امور اور خطے کی موجودہ صورتحال پر تفصیلی گفتگو ہوئی۔
وزیراعظم نے کہا کہ انہوں نے سعودی عرب کے ساتھ پاکستان کی غیر متزلزل یکجہتی کا اعادہ کیا اور مشکل حالات میں سعودی قیادت کی دانشمندانہ حکمت عملی، صبر اور تحمل کو سراہا۔ اس موقع پر وزیراعظم نے سعودی ولی عہد کو امریکہ اور ایران کے درمیان جنگ بندی میں پاکستان کے کردار اور اسلام آباد میں ہونے والے اہم امن مذاکرات سے متعلق حالیہ پیش رفت سے بھی آگاہ کیا۔
شہباز شریف نے اس بات پر زور دیا کہ پاکستان، امریکا اور ایران کے درمیان پائیدار امن معاہدے کے لیے اپنی کوششیں جاری رکھے گا تاکہ خطے میں دیرپا استحکام کو یقینی بنایا جا سکے۔ انہوں نے پاکستان کی امن کوششوں کی حمایت پر سعودی قیادت کا شکریہ بھی ادا کیا۔
دوسری جانب وزیراعظم آفس کی جانب سے جاری اعلامیے کے مطابق جدہ میں ہونے والی یہ ملاقات تقریباً دو گھنٹے تک جاری رہی، جس میں دونوں رہنماؤں نے ابھرتی ہوئی علاقائی صورتحال پر تفصیلی تبادلہ خیال کیا۔
اعلامیے میں کہا گیا کہ وزیراعظم نے علاقائی کشیدگی کے تناظر میں سعودی عرب کے ساتھ مکمل یکجہتی کا اظہار کیا اور حالیہ حالات میں سعودی قیادت کے صبر و تحمل کو سراہا۔ وزیراعظم کا کہنا تھا کہ پاکستانی عوام اپنے سعودی بھائیوں کے شانہ بشانہ کھڑے ہیں۔
اعلامیے کے مطابق سعودی ولی عہد نے امن عمل میں وزیراعظم شہباز شریف اور فیلڈ مارشل کے تعمیری کردار کو سراہا، جبکہ وزیراعظم نے پاکستان کے معاشی استحکام کے لیے سعودی عرب کی مسلسل حمایت کو قابلِ قدر قرار دیا۔
ملاقات کے دوران دونوں رہنماؤں نے دفاع اور سکیورٹی کے شعبوں میں تعاون کو مزید فروغ دینے اور دیرینہ شراکت داری کو مضبوط بنانے کے عزم کا بھی اعادہ کیا۔
