اسلام آباد:ترجمان دفتر خارجہ نے کہا ہے کہ عالمی ثالثی عدالت نے سندھ طاس معاہدے کے تحت پاکستان کے اصولی مؤقف کی توثیق کی ہے۔
ترجمان دفتر خارجہ طاہر حسین اندرابی نے ہفتہ وار نیوز بریفنگ دیتے ہوئے کہا کہ اس فیصلے میں بھارت کے واٹر کنٹرول پر واضح قانونی حدود کی نشاندہی کی گئی ہے.
فیصلے میں اسے متنازع منصوبوں کے حوالے سے پاکستان کو مکمل ڈیٹا اور شفاف معلومات فراہم کرنے کا پابند قرار دیا گیا ہے۔
انہوں نے کہا کہ پاکستان نے فیصلے کو مسترد کرنے کی بھارتی کوشش کو یکسر غیر قانونی قرار دیا ہے۔
پاکستان سندھ طاس معاہدے کے تحت اپنے حقوق کے مکمل تحفظ کا حق رکھتا ہے۔
مقبوضہ جموں و کشمیر کے حوالے سے ایک سوال کے جواب میں انہوں نے کہا کہ مقبوضہ وادی کی صورتحال تشویشناک ہے۔
بھارت کشمیری قیادت اور حریت رہنماؤں کے خلاف جھوٹے مقدمات، نظر بندیوں اور یکطرفہ ٹرائلز کے ذریعے سیاسی نوعیت کا انتقام لے رہا ہے۔
