سیکیورٹی فورسز نے خیبر پختونخوا کے مختلف علاقوں میں کامیاب کارروائیاں کرتے ہوئے بھارتی حمایت یافتہ 34 دہشتگردوں کو اپنے انجام تک پہنچا دیا ، آئی ایس پی آر کے مطابق کامیاب کارروائیاں شمالی اور جنوبی وزیرستان او بنوں کے مختلف علاقوں میں کی گئیں، ان علاقوں میں سینٹائزیشن آپریشن بھی جاری ہے ۔
پاک فوج کے شعبہ اطلاعات عامہ کی جانب سے جاری بیان کے مطابق 13 سے 15 اکتوبر کے درمیان خیبرپختونخوا میں انٹیلی جنس بیسڈ اطلاعات پر کارروائیاں کی گئیں، جس میں بھارتی حمایت یافتہ 34 دہشتگردوں کو ہلاک کیا گیا ۔
آئی ایس پی آر کا کہنا ہے کہ پہلی کارروائی شمالی وزیر ستان کے سپن وارم علاقے میں آپریشن کے دوران فائرنگ کا شدید تبادلہ ہوا جس کے نتیجے میں 18 خوارجی دہشت گرد ہلاک ہو گئے ۔
سکیورٹی فورسز نے دوسری کامیاب کارروائی جنوبی وزیرستان میں کی جہاں انٹیلی جنس بیسڈ آپریشن کے دوران 8 بھارتی حمایت یافتہ دہشتگرد ہلاک کئے گئے ۔
آئی ایس پی آر کا مزید کہنا ہے کہ تیسری کارروائی بنوں میں کی گئی جہاں دوران آپریشن 8 دہشت گردوں کو جہنم واصل کیا گیا ۔
آئی ایس پی آر نے بتایا کہ عزم استحکام کے تحت انسداد دہشت گردی مہم کے سلسلہ میں بھارتی حمایت یافتہ دہشت گردوں کے خاتمے کے لیے خفیہ معلومات پر آپریشن کئے جا رہے ہیں ۔
سکیورٹی فورسز اور قانون نافذ کرنے والے ادارے غیر ملکی حمایت یافتہ دہشت گردی کے مکمل خاتمے تک اپنی کارروائیاں جاری رکھنے کے لیے پرعزم ہیں ۔
