ٹی ٹوئنٹی ورلڈ کپ ، سری لنکا اور اٹلی نے میچز جیت لئے جبکہ عمان اور نیپال کو شکست کا سامنا کرنا پڑا، سری لنکا نے عمان کو 105 رنز سے اور اٹلی نے نیپال کو 10 وکٹوں سے ہرادیا ۔
پالے کیلے گراؤنڈ میں کھیلے گئے ٹی ٹوئنٹی ورلڈ کپ کے 16ویں میچ میں سری لنکا نے عمان کے خلاف مقررہ اوورز میں پانچ وکٹوں کے نقصان پر 227 رنز بنائے، سری لنکا کی جانب سے کوسل مینڈس نے 61، پَون رتناياکے نے جارحانہ 60 اور دسون شناکا نے 50 رنز بنائے ۔
ہدف کے تعاقب میں عمان کی ٹیم 9 وکٹوں کے نقصان پر 120 رنز ہی بنا سکی اور اسے 105 رنز سے شکست ہوئی، عمان کی جانب سے محمد ندیم نے سب سے زیادہ 53 جبکہ وسیم علی نے 27 رنز بنائے ۔
سری لنکا کی طرف سے دشمانتھا چمیرا اور مہیش تھیکشانا نے 2، 2وکٹیں حاصل کیں، جبکہ جارحانہ 60 رنز بنانے پر پَون رتناياکے کو میچ کا بہترین کھلاڑی قرار دیا گیا ۔
دوسری جانب ممبئی میں کھیلے گئے ایونٹ کے 17ویں میچ میں اٹلی نے ٹاس جیت کر فیلڈنگ کا فیصلہ کیا۔ نیپال کی پوری ٹیم آخری اوور میں 123 رنز پر آؤٹ ہوگئی۔ نیپال کی جانب سے عارف شیخ نے 27 اور روہت پاؤڈیل نے 23 رنز بنائے ۔
اٹلی کی طرف سے کریشن نے شاندار بولنگ کا مظاہرہ کرتے ہوئے تین وکٹیں حاصل کیں، اٹلی کی ٹیم نے مقررہ ہدف 13ویں اوور میں بغیر کسی نقصان کے آسانی سے حاصل کرلیا اور 10 وکٹوں سے میچ جیت لیا ۔
اٹلی کی جانب سے انتھونی موسکا نے 62 اور جسٹن موسکا نے 60 رنز بنائے اور دونوں ناٹ آؤٹ رہے، شاندار بولنگ پر کریشن کو میچ کا بہترین کھلاڑی قرار دیا گیا ۔
