افغان صوبہ فراح کے سیکیورٹی سے متعلق حکام نے دعویٰ کیا ہے کہ ایران میں داخل ہونے کی کوشش کرنے والے کم از کم 10 افغان شہری ایرانی بارڈر گارڈز کی فائرنگ سے جاں بحق ہو گئے، جبکہ دو افغانی لاپتہ ہیں ۔
کابل: رپورٹس کے مطابق افغانستان کے مغربی صوبے فراح کی سکیورٹی کمان کے ترجمان محمد نسیم بدری نے افغان میڈیا کو بتایا کہ یہ افراد ’روزگار کی تلاش‘ میں ایران گئے تھے اور پیر کی رات شیخ ابو نصر فراحی بارڈر پوائنٹ کے ذریعے ایران کی حدود میں داخل ہوئے تھے جہاں انہیں فائرنگ کرکے ہلاک دیا گیا ۔
ترجمان نے بتایا کہ تمام ہلاک شدگان افغانستان کے صوبہ فراح کے رہائشی تھے اور غیر قانونی طور پر سرحد پار کر رہے تھے ۔
نسیم بدری نے یہ بھی بتایا کہ اسی گروہ میں شامل 2 افغان شہری تاحال لاپتہ ہیں اور واقعے کی تحقیقات جاری ہیں جبکہ ایران کی جانب سے اس واقعے پر اب تک کوئی ردعمل سامنے نہیں آیا ۔
یہ واقعہ ایسے وقت پیش آیا ہے جب ایران اور افغانستان کی سرحد پر کشیدگی میں اضافہ دیکھنے میں آ رہا ہے۔گزشتہ ایک سال کے دوران ایران نے سیکڑوں افغان مہاجرین کو زبردستی واپس بھیجا ہے ۔
