تربت میں پاک بحریہ کی بیس پی این ایس صدیق پردہشتگردوں کا حملہ ناکام بنا دیا گیا، سیکورٹی فورسز کی شاندار کارروائی میں 4 دہشتگرد جہنم سدھار گئے۔
آئی ایس پی آر کے مطابق سکیورٹی فورسز نے تربت میں پاک بحریہ کے ائیر بیس پی این ایس صدیق کی حفاظت یقینی بناتے ہوئے بروقت اور مؤثر جواب دیا۔
آئی ایس پی آر کے مطابق ائیربیس پی این ایس صدیق تربت پرحملہ 25 اور 26 مارچ کی درمیانی شب ہوا۔ حملہ ہوتے ہی بحری دستوں کی مدد کے لیے ارد گرد موجود سکیورٹی فورسز کو متحرک کیا گیا اور مسلح افواج نے مل کر دشمن کو منہ توڑ جواب دیا اور مشترکہ کلیئرنس آپریشن میں چاروں دہشتگردوں کو ہلاک کردیا گیا۔
آئی ایس پی آر کے مطابق دہشتگردوں کے ساتھ فائرنگ کے تبادلے میں ایف سی بلوچستان کے سپاہی نعمان فرید شہید ہو گئے، 24 سالہ سپاہی نعمان فرید شہید کا تعلق مظفرگڑھ سے ہے۔ آئی ایس پی آر کے مطابق علاقے میں مزید کسی دہشتگرد کے خاتمے کے لیے کلیئرنس آپریشن جاری ہے۔
