شانگلہ کے علاقے چکیسر میں پولیس چوکی پر دہشتگردوں کےحملے میں 2 پولیس اہلکار شہید ہوگئے۔
تفصیلات کے مطابق ضلع شانگلہ کی تحصیل چکسر میں واقع گنا نگر پولیس چوکی پر عسکریت پسندوں نے اندھا دھند فائرنگ کی اور ہینڈ گرنیڈ پھینکا جس کے نتیجے میں ہیڈ کانسٹیبل نثار احمد اور اے ایس آئی حسن خان موقع پر ہی جاں بحق ہوگئے جبکہ تین اہلکار زخمی ہوگئے، زخمیوں کی شناخت محمد حسین، ارشد خان اور رفعت کے نام سے ہوئی ہے۔
واقعے کے بعد پولیس کی بھاری نفری موقع پر پہنچ گئی اور حملے میں ملوث ملزمان کی گرفتاری کے لیے سرچ آپریشن شروع کردیا جبکہ جاں بحق اور زخمی پولیس اہلکاروں کو ڈی ایچ کیو ہسپتال بٹگرام منتقل کر دیا گیا۔
دوسری جانب وزیر داخلہ سید محسن نقوی نے پولیس چوکی پر دہشت گردوں کے حملے کی شدید مذمت کی ہے۔محسن نقوی نے سوگوار خاندانوں سے دلی تعزیت کا اظہار کیا۔ انہوں نے حملے میں شدید زخمی ہونے والے تین پولیس اہلکاروں کی جلد صحت یابی کے لیے دعا کی۔ انہوں نے کے پی پولیس کے اہلکاروں کو شاندار خراج تحسین پیش کیا جنہوں نے قوم کے لیے گراں قدر قربانیاں دیں۔ نقوی نے کہا کہ کے پی پولیس اہلکاروں کی قربانیوں کو ہمیشہ یاد رکھا جائے گا۔
