حال ہی میں جاپان میں آنے والے زلزلے سے اب تک ہلاکتوں کی تعداد 62 تک جا پہنچی ہے۔
غیر ملکی میڈیا کے مطابق، نئے سال کے آغاز پر وسطی جاپان میں 7.6 شدت کا زلزلہ ریکارڈ ہوا ہے، جس نے جاپان کے ساحلی علاقے کو نہایت متاثر کن طریقے سے ہلا کر رکھا ہے. جاپان کے ساحلی علاقے کو نا صرف ہلا کر رکھ دیا بلکہ سونامی کے خطرے کو بھی بڑھا دیا۔زلزلے سے متاثرہ علاقے اشیکاوا میں ریسکیو اہلکاروں نے زلزلے سے متاثرہ افراد کی تلاش جاری رکھی ہوئی ہے تاہم انتظامیہ نے خبردار کیا ہےکہ شدید بارش، لینڈ سلائیڈنگ اور بار بار آفٹر شاکس امدادی سرگرمیوں میں رکاوٹ بن سکتے ہیں۔
مقامی انتظامیہ کا کہنا ہے کہ یکم جنوری کو آنے والے زلزلے میں اب تک 62 افراد ہلاک ہوچکے ہیں جب کہ 300 کے قریب افراد زخمی ہیں جن میں 20 کی حالت تشویش ناک ہے۔ذرائع کے مطابق زلزلے کے بعد سے 31 ہزار 800 سے زائد افراد کو پناہ فراہم کی گئی ہے جب کہ ہلاکتوں کے مزید بڑھنے کا بھی خدشہ ظاہر کیا جارہا ہے۔یاد رہےکہ زلزلے کے بعد جاپانی محکمہ موسمیات کی جانب سے اشیکاوا، نیگاتا اور تویاما نامی ساحلی علاقوں کے لیے سونامی وارننگ جاری کی گئی تھی جو بعد میں واپس لے لی گئی۔
