کراچی: ملک کے مختلف ایئر پورٹس پر جہازوں پر لیزر لائٹ مارنے کا معاملہ خطرناک ہو گیا ہے، جو لینڈنگ کے وقت پریشانی کا باعث ہے ـ
زرائع کے مطابق گزشتہ 8 ماہ کے دوران کراچی سمیت ملک کے 8 ایئرپورٹس پر ملکی و غیر ملکی ایئر لائنز کے جہازوں پر 101 بار لیزر لائٹ مارنے کے واقعات رپورٹ ہوئے ہیں۔ پاکستان ایئرپورٹ اتھارٹی کی جانب سے جاری کردہ اعداد و شمار کے مطابق ، سب سے زیادہ کراچی ایئرپورٹ پر 37، دوسرے نمبر پر لاہور میں 33 واقعات رپورٹ ہوئے، جب کہ اسلام آباد، پشاور، سیالکوٹ، کوئٹہ ایئرپورٹ پر بھی جہازوں پر لیزر لائٹ مارنے کے واقعات رپورٹ ہوئے۔
ذرائع کا کہنا ہے کہ اس سلسلے میں اس سال تھوڑی سی کمی آ گئی ہے ـ کیونکہ پچھلے سال اس طرح کے 193 واقعات رپورٹ ہوئے تھے۔ تاہم ایئرپورٹ اتھارٹی کے مطابق جہازوں کو لیزر لائٹ کے لگنے سے جہازوں کی سیفٹی کو خطرات لاحق ہو جاتے ہیں۔
زرائع کا کہنا ہے کہ رات کے اوقات میں اندورنی و بیرونی ملک سے آنے والی پروازوں پر لیزر لائٹ پڑنے بہت مسائل پیش آرہے ہیں کیونکہ اس سے کپتانوں کو لینڈنگ کے وقت پریشانی کا سامنا کرنا پڑتا ہے، پاکستان ایئرپورٹ اتھارٹی کی جانب سے ایئر پورٹس پر طیاروں کو لائٹ مارنے کے حوالے سے ضلعی انتظامیہ کو خطوط بھی لکھے گئے ہیں۔
ذرائع کے مطابق ایئرپورٹ کے اطراف ریسٹورنٹ، شادی ہالوں پر لگی بڑی لائٹوں کی وجہ سے بھی طیاروں کو لینڈنگ اور ٹیک آف کے دوران کپتانوں کو مشکلات کا سامنا رہا۔ اتھارٹی نے کہا ہے کہ جہازوں پر لیزر لائٹ کا پڑنا انتہائی خطرناک ہے اس لیے اس کا سختی سے نوٹس لیا جائے۔
