ملک بھر میں ایندھن کی فراہمی کی صورتحال مستحکم اور تسلی بخش ہے، پیٹرولیم ڈویژن

صدر مملکت اور وزیرِ اعظم پاکستان کی ہدایات کے مطابق وفاقی وزیر برائے خزانہ سینیٹر محمد اورنگزیب نے پیٹرولیم مصنوعات کی صورتحال پر ایک اعلیٰ سطح مشاورتی اجلاس کی صدارت کی۔ پیٹرولیم ڈویژن کی جانب سے ملک میں پیٹرولیم مصنوعات کی دستیابی کی موجودہ صورتحال پر ایک تفصیلی بریفنگ دی گئی۔ اجلاس کو بتایا گیا کہ ملک بھر میں ایندھن کی فراہمی کی صورتحال مستحکم اور تسلی بخش ہے۔
وزارتِ انفارمیشن ٹیکنالوجی و ٹیلی کمیونیکیشن نے بھی پیٹرولیم مصنوعات کے لیے سبسڈی کے نظام کو مؤثر بنانے کے لیے مجوزہ تکنیکی حل پر پریزنٹیشن دی، جس میں شفافیت اور مؤثر ترسیل پر خصوصی توجہ دی گئی۔
اجلاس میں صوبائی قیادت نے موجودہ صورتحال اور پالیسی آپشنز پر اپنے خیالات کا اظہار کیا۔ وزیراعلیٰ سندھ، سید مراد علی شاہ نے ملک میں ایندھن کی بلا تعطل دستیابی برقرار رکھنے کے لیے وفاقی حکومت کی کوششوں کو سراہا۔ مریم اورنگزیب نے حکومتِ پنجاب کی نمائندگی کرتے ہوئے کہا کہ عالمی سطح پر پیٹرولیم قیمتوں میں کسی بھی کمی کا فائدہ مؤثر انداز میں صارفین تک پہنچنا چاہیے۔