وزیر دفاع خواجہ آصف نے ضمنی الیکشن سے بائیکاٹ کے پی ٹی آئی کے فیصلوں کو تنقید کا نشانہ بناتے ہوئے کہا ہے کہ خیبر پختونخوا میں دھاندلی کے سہارے کھڑے ہیں جب کہ پنجاب میں عوامی فیصلہ سہنے کی ہمت نہیں ۔
اسلام آباد: پی ٹی آئی کی جانب سے ضمنی الیکشن کے بائیکاٹ پر اپنے ردعمل میں وزیر دفاع خواجہ آصف نے کہا کہ جہاں کرسی اور حکومت ہو، وہاں الیکشن شوق سے،جہاں عوام کا فیصلہ ہو، وہاں بائیکاٹ ہو ۔
انہوں نے کہا کہ خیبر پختونخوا میں الیکشن لڑنے کو تیار ہیں کیونکہ وہاں اپنی حکومت ہے، اپنی مرضی کا نتیجہ نکال سکتے ہیں مگر پنجاب میں الیکشن سے راہِ فرار ہے کیونکہ عوام کی طاقت سے شکست یقینی ہے، خیبر پختونخوا میں دھاندلی کے سہارے کھڑے ہیں جب کہ پنجاب میں عوامی فیصلہ سہنے کی ہمت نہیں ۔
خواجہ آصف نے مزید کہا کہ یہ الیکشن نہیں، اپنی مرضی کا کھیل ہے،جہاں جیت کا یقین، وہاں مقابلہ اور جہاں ہار یقینی وہاں بائیکاٹ کردیا جائے، یہ عوامی اعتماد سے نہیں بلکہ سرکاری مشینری سے الیکشن جیتنے کے خواہشمند ہیں ۔
