اسلام آباد: وفاقی وزیر امور کشمیر اور پاکستان مسلم لیگ (ن) خیبرپختونخوا کے صدر انجینئر امیرمقام نے تحریک عدم اعتماد کی منظوری کے تین سال مکمل ہونے پر پی ڈی ایم کے تمام قائدین کو خراج تحسین پیش کیا ہے ۔
تحریک عدم اعتماد کی منظوری کے تین سال مکمل ہونے کے موقع پر اپنے ایک بیان میں وفاقی وزیر امیر مقام کا کہنا تھا کہ آج کا دِن عوام ، آئین اور پارلیمنٹ کی فتح کا دِن ہے،10 اپریل کو محمد نوازشریف کے سیاسی وژن ، صبر اور ملک وقوم سے وفاداری کی جیت کا دِن ہے ۔
انہوں نے کہا کہ مسلم لیگ (ن)، پیپلزپارٹی، جے یو آئی (ف) سمیت پی ڈی ایم کی سیاسی وجمہوری جماعتوںکی قیادت کی سیاسی جدوجہد کی فتح ہوئی ۔
امیر مقام کا کہنا تھا کہ تین سال میں ملک کو ڈیفالٹ کے اندھیروں سے بچا کر ترقی کی اجالوں کی طرف واپس لائے ہیں، تین سال پہلے بنی گالہ کا گند صاف نہ ہوتا تو پورا ملک آج بربادی کی داستان کے سوا کچھ نہ ہوتا ۔
وفاقی وزیر نے کہا کہ پی ٹی آئی نے نوازشریف دور کی 3.8 فی صد کی مہنگائی 40 فی صد کی تاریخی سطح پر پہنچاکر عوام کا کچومر نکال دیا ،پی ٹی آئی کے چار سال کے دور میں معاشی ترقی منفی ہوگئی، نوازشریف دور میں ملک 6 فی صد سے زائد کی رفتار سے ترقی کررہا تھا ۔
وفاقی وزیر کا مزید کہنا تھا کہ وزیراعظم شہبازشریف، بلاول بھٹو، مولانا فضل الرحمن اور تمام پی ڈی ایم قائدین نے تاریخی کردار ادا کیا،نوازشریف نے دہشت گردی اور لوڈ شیڈنگ کا خاتمہ کردیا تھا، پی ٹی آئی چار سال میں یہ مسائل واپس لے آئی ۔
انہوں نے یہ بھی کہا کہ آج جمہوریت کی بات کرنے والوں نے تحریک عدم اعتماد ناکام بنانے کے لئے آئین شکنی کرتے ہوئے قومی اسمبلی توڑ دی تھی، ملک کو بند گلی میں لیجانے والا آج خود اڈیالہ جیل میں بند اور مکافات عمل کا شکار ہے ۔
