نیشنل ڈیزاسٹر منیجمنٹ اتھارٹی نے ملک میں اگلے 24 گھنٹوں کے دوران بارشوں کا الرٹ جاری کر دیا، اس دوران پنجاب، سندھ اوربلوچستان میں تیز بارشوں کا امکان ہے ۔
اسلام آباد: این ڈی ایم اے کی جانب سے بتایا گیا کہ آئندہ 24 گھنٹوں کے دوران پنجاب، سندھ اوربلوچستان میں تیز بارشوں کا امکان ہے، پنجاب کے شمال مشرقی اور جنوبی اضلاع میں بھی وقفے وقفے سے بارش کا امکان ہے ۔
این ڈی ایم اے کے مطابق گوجرانوالہ، سیالکوٹ، لاہور، حافظ آباد، فیصل آباد، چنیوٹ اور سرگودھا کے مختلف علاقوں میں وقفے وقفے سے بارش متوقع ہے۔ملتان، لیہ، خانیوال، وہاڑی، بہاولپور، بہاولنگر،مظفرگڑھ، ڈیرہ غازی خان، خانپور، راجن پور، لیاقت پور، ظاہرپیر،صادق آباداور رحیم یار خان کے علاقوں میں شدید طوفانی بارشوں کا امکان ہے ۔
این ڈی ایم اے کا کہنا ہے کہ نشیبی علاقوں میں سیلابی صورتحال، ندی نالوں میں طغیانی اورپہاڑی علاقوں میں لینڈ سلائیڈنگ کا خدشہ ہے، سندھ کے جنوبی اضلاع میں اگلے 12 تا 24گھنٹوں کے دوران طوفانی ہواؤں کے ساتھ شدید بارشوں کا امکان ہے ۔
جنوبی اضلاع بشمول ٹھٹھہ، بدین، تھرپارکر، مٹھی، عمر کوٹ، میرپور خاص، ٹنڈو محمد خان، ٹنڈو آدم، حیدرآباد، کراچی اور گردونواح میں بارش متوقع ہے ۔
سندھ کے بالائی اور وسطی اضلاع میں بھی اگلے 12سے 24 گھنٹوں کے دوران وقفے وقفے سے ہلکی بارش کا امکان ہے۔سکھر، لاڑکانہ، شہید بینظیر آباد، خیرپور، دادو، جیکب آباد، کشمور، جامشورو میں بارش متوقع ہے ۔
این ڈی ایم اے کے مطابق بلوچستان کے متعدد اضلاع میں اگلے 12 سے 24 گھنٹوں کے دوران گرج چمک کے ساتھ وقفے وقفے سے بارشوں کا امکان ہے، ژوب، لورالائی، سبی، ڈیرہ بگٹی، سوئی، خضدار، آواران، بارکھان اور لسبیلہ کے علاقوں میں آندھی طوفان کے ساتھ بارش متوقع ہے ۔
این ڈی ایم اے کے مطابق بارش کے باعث نشیبی علاقوں میں اربن فلڈنگ کی وارننگ ہے ، عوام احتیاط کریں ۔
