پاکستان کو آج دنیا کی ساتویں ایٹمی قوت بنے ہوئے 26 برس بیت گئے ہیں، پاکستان نے بھارت کے ایٹمی دھماکوں کے جواب میں 28 مئی 1998 کو یکے بعد دیگرے پانچ ایٹمی دھماکے کئےاور اپنی جوہری قوت ہونے کا اعلان کیا،آج 28 مئی کو اُسی عظیم کامیابی کی یاد میں یوم تکبیر منایا جارہا ہے۔
28 مئی 1998 کے دن چاغی کے مقام پر اچانک ہی زمین ارتعاش میں آگئی، ریکٹر اسکیل پر 5.0 شدت کا زلزلہ آیا لیکن اس کی ھیبت نے پڑوسی ملک بھارت کے غرور کو خاکھ میں ملا دیا۔چاغی کے پہاڑوں سے ریت دھواں بن کر اڑنے لگی اور سرمئی پہاڑوں کا رنگ سنہری ہوگیا اور اس کی وجہ سے پاکستان کے یکے بعد دیگرے 5 ایٹمی دھماکے تھے۔پاکستان نے 28 مئی کو 5 جبکہ 30 مئی کو چھٹا ایٹمی دھماکہ کرکے پوری دنیا کی ساتویں اور عالم اسلام کی پہلی جوہری قوت کا اعلان کیا۔ان دھماکوں نے بھارتی حکمرانوں کی زبانیں بند کر دی۔
پاکستان کو ایٹمی دھماکوں سے روکنے کے لیے نہ ہی امریکی دباؤ کام آیا نہ ملکی دفاع کے عزم کے لئے عالمی پابندیوں کا شکار ہوا۔ چاغی کے پہاڑوں میں پاکستان نے دھماکہ کرکے اپنے ناقابل تسخیر دفاع کا ثبوت دے کر جنوبی ایشیا میں طاقت کا توازن بھی برابر کردیا۔
افواج پاکستان کی جانب سے پوری قوم کو مبارکباد
یوم تکبیر کی 26 ویں سالگرہ کے موقع پر چیئرمین جوائنٹ چیفس آف اسٹاف کمیٹی اور افواج پاکستان کی طرف سے قوم کو مبارکباد پیش کی گئی ہے۔پاک فوج کے شعبہ تعلقات عامہ ( آئی ایس پی آر ) کی طرف سے جاری اعلامیہ کے مطابق یہ کہا گیا ہے کہ اہم موقع پاکستان کے جوہری تجربات کی کامیابی کی یاد دلاتا ہے، 1998 میں پاکستان کی تاریخی کامیابی سے قابل اعتبار کم از کم ڈیٹرنس قائم کیا اور چاغی کے پہاڑوں میں پاکستان کے ایٹمی دھماکوں نے خطے میں طاقت کا توازن بحال کیا ہے۔اعلامیہ کے مطابق یہ کارنامہ بہت سی مشکلات کے بعد پیش کیا گیا، اِس خواب کو پورا کرنے والوں کو سلام پیش کرتے ہیں۔تاریخی دن پر مسلح افراج کی طرف سے مادروطن کے دفاع کو ہر حال میں یقینی بنانے کے غیر متزلزل عزم کا اعادہ کیا گیا ہے۔مزید اعلامیہ میں کہا گیا ہے کہ ملکی سلامتی اورخودمختاری کا تحفظ کسی بھی قیمت پر یقینی بنایا جائے گا۔
