خیبرپختونخوا سے اسلام آباد کی جانب آتے ہوئے اور پنجاب کے مختلف علاقوں میں پی ٹی آئی کارکنوں نے پولیس اہلکاروں پر حملے کئے ہیں جن میں اب تک ایک اہلکار شہید او 115 تک شدید زخمی ہوئے ہیں ۔
پولیس کے مطابق زخمی ہونے والوں میں ایس پی، ڈی ایس پی اور دیگر اہلکار شامل ہیں ۔
ہکلہ کے قریب جھڑپوں کے دوران مظاہرین نے پولیس اہلکاروں کو تشدد کا نشانہ بنایا جس کے بعد انہیں طبی امداد کے لیے تحصیل ہیڈ کوارٹر حسن ابدال منتقل کیا گیا۔
مظاہرین نے احتجاج کے دوران ڈیوٹی پر مامور پولیس اہلکاروں پر حملہ کیا، جس کے نتیجے میں 46 سالہ کانسٹیبل مبشر سر پر چوٹ لگنے کی وجہ سے شدید زخمی ہوا، جو بعد ازاں ہسپتال میں جاں کی بازی ہار کر شہید ہوگیا۔
زخمی اہلکار کو تشویشناک حالت میں ہسپتال منتقل کیا گیا تھا۔ متوفی کے سوگواران میں دو بیٹیاں، ایک بیٹا اور بیوی شامل ہے۔
شر پسندوں کے تشدد کی وجہ سے مختلف علاقوں میں پولیس کے 115 اہلکار زخمی ہوئے جن کے سر، بازو اور ٹانگوں پر زخم آئے ہیں۔ پولیس کا کہنا ہے کہ قانون نافذ کرنے والے ادارے عوام کے جان و مال کی تحفظ کیلئے پرعزم ہیں ۔
سی سی ٹی وی فوٹیجز سے شرپسند حملہ آوروں کی شناخت کا عمل جاری ہے۔شدت پسند شر پسند عناصر کو ہر حال میں قانون کے کٹہرے میں لایا جائے گا۔
