وفاقی وزیر خزانہ محمد اورنگزیب نے کہا ہے کہ ہم معاشی ترقی کی طرف چل پڑے ہیں، اس سال معاشی لحاظ سے نمایاں پیش رفت ہوئی ہے، معیشت درست سمت میں گامزن ہے، ہم معاشی استحکام سے گروتھ کی جانب بڑھیں گے، وزیر اطلاعات عطا اللہ تارڑ کا کہنا ہے کہ بجٹ میں عوام کو ریلیف دیا گیا، وزیراعظم کا وعدہ تھا جیسے ہی گنجائش پیدا ہوئی عوام کو ریلیف دیں گے، ایف بی آر کا کلچر تبدیل ہوچکا ہے، لیکج میں کمی کا آغاز شوگرانڈسٹری سے کیا گیا ہے ۔
اسلام آباد میں مشترکہ پوسٹ بجٹ پریس کانفرنس کرتے ہوئے وفاقی وزیر خزانہ محمد اورنگزیب کا کہنا تھا کہ حکومت نے بجٹ میں برآمدات اور ٹیکس نظام کی بہتری پر خصوصی توجہ دی ہے تاکہ معیشت کو پائیدار بنیادوں پر استوار کیا جا سکے ۔
وزیر خزانہ نے کہا کہ ہم معاشی ترقی کی طرف چل پڑے ہیں، اس سال معاشی لحاظ سے نمایاں پیش رفت ہوئی ہے، معیشت درست سمت میں گامزن ہے، ہم معاشی استحکام سے گروتھ کی جانب بڑھیں گے ۔
انہوں نے کہا کہ عوامی ریلیف کے لیے 70 ارب روپے کی اضافی سبسڈی فراہم کی گئی ہے، آئی ٹی برآمدات بڑھ کر 4 ارب 50 کروڑ ڈالر تک پہنچیں گی، جو ملکی معیشت کے لیے ایک مثبت پیش رفت ہوگی، وزیراعظم سمیت سب نےاتفاق کیا کہ سپرٹیکس ختم ہونا چاہئے، کسانوں کیلئے ذرخیزی سکیم متعارف کرائی گئی، جبکہ نوجوانوں کیلئے وزیراعظم یوتھ لان مختص کیا گیا ۔
وزیر مملکت برائے خزانہ بلال اظہر کیانی: ۔
اس موقع پر وزیر مملکت برائے خزانہ بلال اظہر کیانی نے کانفرنس کے دوران کہا کہ وزیرخزانہ نے کل ایک عوامی بجٹ پیش کیا، یہ تنخواہ دار، صنعتکار اور ایکسپورٹر کا بجٹ ہے، ترجیح تھی کہ تنخواہ دار طبقے کو ریلیف دیا جائے، وزیراعظم نے تنخواہ دار طبقے سے اپنا وعدہ پورا کیا ہے، وزیراعظم نے کاروباری برادری سے مسلسل رابطہ رکھا ۔
بلال اظہرکیانی نے کہا کہ بجٹ کی تیاری میں ملک بھر کے چیمبرز آف کامرس سے مشاورت کی گئی، جبکہ برآمدی صنعت کی ضروریات کو مدنظر رکھتے ہوئے مختلف اقدامات شامل کیے گئے، تنخواہ پر5 فیصد ٹیکس کو ایک فیصد کیا، 15 فیصد کو 13 فیصد کیا، تاہم بڑی تنخواہوں اور سرچارج اقدامات پراچھا فیڈبیک ملا ہے ۔
بلال اظہر کیانی نے کہا کہ بجٹ میں ان طبقات کو بھی ریلیف دیا، جن کوگزشتہ مالی سال نہیں دیا گیا، کمزور طبقات اور خواتین کیلئے بھی بجٹ میں حصہ رکھا گیا، مڈل کلاس طبقات کیلئے اپنا گھر سکیم متعارف کی گئی، مڈل کلاس پلاٹ توخرید لیتا ہے لیکن گھربنانے کے پیسے نہیں ہوتے ہیں ۔
وفاقی وزیر اطلاعات عطا اللہ تارڑ: ۔
مشترکہ پریس کانفرنس سے خطاب میں وفاقی وزیر اطلاعات عطا اللہ تارڑ نے کہا کہ بجٹ میں عوام کو ریلیف دیا گیا، وزیراعظم کا وعدہ تھا جیسے ہی گنجائش پیدا ہوئی عوام کو ریلیف دیں گے، ایف بی آر کا کلچر تبدیل ہوچکا ہے، لیکج میں کمی کا آغاز شوگرانڈسٹری سے کیا گیا ہے ۔
انہوں نے کہا کہ وزیراعظم عوام کو ریلیف دینے کیلئے مسلسل کوشش کرتے ہیں، تنکا تنکا کرکےعوام کے ریلیف کیلئے گنجائش پیدا کی گئی ہے، بجٹ میں وزیراعظم نےعوام سے کیا وعدہ وفا کیا، بجٹ میں سب سے پہلے تنخواہ دار کا خیال رکھا گیا ہے ۔
وفاقی وزیر کا کہنا تھا کہ وزیراعظم اپنا گھر پروگرام کے ذریعےعوامی ریلیف کیلئے گنجائش پیدا کی گئی،تاہم بجٹ میں مڈل کلاس طبقے کیلئے بھی گنجائش پیدا کی گئی ہے، یہ مزدور، تنخواہ دار، صنعتکار اور ہرکسی کا بجٹ ہے ۔
