بالی ووڈ مشہور و معروف اداکار سلمان خان کے والد سلیم خان کو ایک نامعلوم عورت کی جانب سے جان سے مارنے کی دھمکی موصول ہوئی ہے۔
غیر ملکی خبر رساں ادارے کی رپورٹس کے مطابق اداکار سلمان خان کے والد سلیم خان اپنی روٹین کے مطابق صبح کی سیر کرنے پارک گئے تھے کہ وہاں اچانک ایک موٹر سائیکل ان کے پاس آکر رکی،موٹر سائیکل پر ایک عورت اور مرد سوار تھے ـ جس میں سے عورت موٹر سائیکل سے اتری اور اس نے سلیم خان کے پاس آکر انہیں جان سے مارنے کی دھمکی دی۔
رپورٹ کے مطابق ، عورت نے سلیم خان کو دھمکی دیتے ہوئے یہ بھی کہا کہ ’لارنس بشنوئی کو بلاؤں کیا‘؟دھمکی دینے کے بعد دونوں موٹر سائیکل سوار وہاں سے چلے گئے۔
واقعے کے بعد سلیم خان نے باندرہ پولیس اسٹیشن میں شکایت درج کروائی جس کے بعد پولیس نے کچھ مشتبہ افراد کو پوچھ گچھ کے لیے حراست میں لے لیا۔
اس سے قبل 14 اپریل کو 2 موٹر سائیکل مسلح افراد نے ممبئی کے باندرہ میں واقع سلمان خان کی رہائش گاہ گلیکسی اپارٹمنٹس کے باہر فائرنگ کی اور موقع سے فرار ہو گئے۔
پولیس نے سی سی ٹی وی فوٹیج کی مدد سے ملزمان کو گرفتار کیا۔ پوچھ گچھ کے دوران یہ بات سامنے آئی کہ فائرنگ کے پیچھے گینگسٹر لارنس بشنوئی کا ہاتھ تھا۔ملزمان نے اعتراف کیا کہ لارنس بشنوئی نے سلمان خان کی رہائش گاہ پر فائرنگ کرنے پر ان سے 400,000 روپے دینے کا وعدہ کیا تھا۔
