مالاکنڈ: درگئی کے علاقے ورتیر نگردرہ کے پہاڑی سلسلے میں اچانک آگ بھڑک اٹھی جس نے دیکھتے ہی دیکھتے وسیع رقبے کو اپنی لپیٹ میں لے لیا۔ آگ لگنے سے علاقے میں موجود جنگلات اور قدرتی نباتات کو نقصان پہنچنے کی اطلاعات موصول ہوئی ہیں۔
ریسکیو 1122 حکام کے مطابق آگ لگنے کی اطلاع ملتے ہی فائر فائٹرز ٹیم فوری طور پر موقع پر پہنچ گئی اور امدادی کارروائیاں شروع کردیں۔ تاہم تیز ہواؤں کے باعث آگ نے شدت اختیار کرلی جس سے پہاڑی علاقے میں شعلے تیزی سے پھیلنے لگے۔
ریسکیو اہلکار آگ پر قابو پانے کے لیے مسلسل کوششوں میں مصروف ہیں جبکہ صورتحال سے نمٹنے کے لیے مزید نفری اور وسائل بھی طلب کر لیے گئے ہیں۔
ذرائع کے مطابق ابتدائی طور پر آگ سے جنگلات اور قدرتی نباتات کو نقصان پہنچا ہے، تاہم کسی جانی نقصان کی اطلاع موصول نہیں ہوئی۔ حکام کا کہنا ہے کہ آگ پر قابو پانے کے بعد نقصان کے مکمل تخمینے اور آگ لگنے کی وجوہات کا تعین کیا جائے گا۔
