پاکستان کے معروف اداکار، ہدایتکار اور مصنف یاسر حسین نے آج خیبر نیٹ ورک کے ہیڈ آفس اسلام آباد کا خصوصی دورہ کیا۔ اپنے دورے کے دوران انہوں نے نیٹ ورک کے مختلف شعبہ جات کا جائزہ لیا، ادارے کے اراکین سے ملاقات کی اور ادارے کے کام کے انداز کو سراہا۔
اس موقع پر یاسر حسین نے اپنے خیالات کا اظہار کرتے ہوئے کہا کہ:
"خیبر نیٹ ورک میرے دل کے قریب ہے، کیونکہ میں نے اپنے کیریئر کا آغاز اسی نیٹ ورک کے چینل ‘کے ٹو ٹی وی’ سے کیا تھا۔ مجھے یہاں آ کر ہمیشہ اپنائیت کا احساس ہوتا ہے۔”
انہوں نے یہ بھی کہا کہ وہ چاہتے ہیں کہ خیبر نیٹ ورک انہیں بار بار مدعو کرے تاکہ وہ اس ادارے کا حصہ بن کر اپنی پرانی یادیں تازہ کر سکیں۔ یاسر حسین نے بتایا کہ جب بھی وہ اسلام آباد آتے ہیں تو کوشش کرتے ہیں کہ خیبر نیٹ ورک کا دورہ ضرور کریں۔
دورے کے دوران یاسر حسین نے خیبر نیٹ ورک کے ایگزیکٹو ڈائریکٹر کیوان حامد راجہ سے ملاقات کی۔ دونوں نے میڈیا، فلاحی سرگرمیوں اور باہمی دلچسپی کے امور پر تفصیلی تبادلہ خیال کیا۔
اس موقع پر یاسر حسین نے خیبر نیٹ ورک سے وابستہ فلاحی ادارے ’خود مختار ساوی‘ کے حوالے سے بھی خصوصی گفتگو کی۔ ان کا کہنا تھا کہ:
"خود مختار ساوی، مرحوم مختار حامد راجہ کی فلاحی خدمات کا تسلسل ہے۔ یہ ادارہ ان کی سوچ، جذبے اور عوامی خدمت کے عزم کو زندہ رکھے ہوئے ہے۔ مجھے خوشی ہے کہ میں بھی اس مشن کا حصہ ہوں۔”
بعد ازاں یاسر حسین نے خود مختار ساوی کی صدر محترمہ مریم کیوان سے بھی ملاقات کی اور ادارے کی فلاحی سرگرمیوں اور خدمات کو سراہا۔ دورے کے اختتام پر یاسر حسین نے خیبر نیٹ ورک کے تمام اسٹاف کا شکریہ ادا کیا اور کہا کہ وہ جلد دوبارہ اس ادارے کا دورہ کریں گے۔
