اسلام آباد(ویب ڈیسک) پاکستان مسلم لیگ (ن) کی نائب صدر مریم نواز نے عمران خان سے کہا ہے کہ سعودی ولی عہد کی جانب سے دیئے گئے تحائف کو بیچنے کی رسیدیں نکالیں۔
سماجی رابطے کی سائٹ ٹوئٹر پر مریم نواز نے چیئرمین پی ٹی آئی عمران خان پر کڑی تنقید کی ۔ انہوں نے کہا کہ دوسروں کو چور کہنے والا پاکستان کا سب سے بڑا چور نکلا توبہ!۔ مریم نواز نے عمران خان سے مطالبہ کیا کہ ادھر ادھر کی باتیں مت کرو۔ رسیدیں نکالو!۔ گھڑی کس کو بیچی، نام بتاؤ؟۔ پیسہ پاکستان کیسے منگوایا، وہ بتاؤ۔
قبل ازیں متحدہ عرب امارات کے ایک تاجر عمر فاروق نے دعویٰ کیا ہے کہ عمران خان کو سعودی ولی عہد کی جانب سے ملی گھڑی اور دیگر تحائف میں نے20 لاکھ ڈالرز کی رقم ادا کر کے فرح خان سے خریدے تھے۔
نجی ٹی وی کو دیے گئے انٹرویو میں تاجر عمر فاروق نے دعویٰ کیا کہ سابق مشیر برائے احتساب و داخلہ شہزاد اکبر نے 2019 میں گھڑی، انگوٹھی اور دیگر تحائف بیچنے کیلیے رابطہ کیا۔ عمران خان کو ملے سعودی ولی عہد کے تحائف دبئی میں فرح خان میرے دفتر میں لائیں تھی۔
