خیبر پختونخوا کے ضلع کرم کے حلقہ این اے 45 کے ضمنی الیکشن میں تمام 143 پولنگ اسٹیشن کا غیر سرکاری غیر حتمی نتیجہ آگیا ہے۔ تمام 143 پولنگ اسٹیشن کے غیر سرکاری غیر حتمی نتیجے کے مطابق چیئرمین پاکستان تحریک انصاف(پی ٹی آئی) عمران خان 20 ہزار 748 ووٹ لے کر کامیاب ہوگئے ہیں۔
عمران خان اور جمعیت علماء اسلام سے تعلق رکھنے والے پاکستان ڈیموکریٹک موومنٹ (پی ڈی ایم) کے حمایت یافتہ امیدوار جمیل خان میں سخت مقابلہ متوقع تھا، تاہم جمیل خان 12 ہزار 718 ووٹ حاصل کرسکے۔ خیال رہےکہ این اے 45 کی نشست پی ٹی آئی کے ملک فخر زمان کے مستعفی ہونے سے خالی ہوئی تھی۔
این اے 45 کے ضمنی الیکشن میں صبح 9 بجے سے پولنگ کا عمل شروع ہوا جو کسی وقفے کے بغیر شام 5 بجے تک جاری رہا۔ ڈسٹرکٹ الیکشن کمشنر عبد الرؤف خان کے مطابق اس حلقے میں رجسٹرڈ ووٹرز کی تعداد 1 لاکھ 98 ہزار 618 ہے۔ حلقے کے 143 پولنگ اسٹیشنز میں سے 24 انتہائی حساس اور 119 کو حساس قرار دیا گیا تھا۔
