لورالائی: ایف سی کی گاڑی پر حملہ، ایک اہلکار شہید، میجر سمیت 2 اہلکار زخمی
بلوچستان کے علاقے لور الائی کے قریب ایف سی کی گاڑی پر دہشتگردوں کے حملے میں ایک اہلکار شہید اور میجر سمیت دو اہلکار زخمی ہو گئے۔ پاک فوج کے شعبہ تعلقات عامہ (آئی ایس پی آر) کے مطابق لورا لائی کے قریب دہشتگردوں نے ایف سی کی گاڑی پر حملہ کیا، دہشتگرد حملے میں نائیک شریف شہید جبکہ میجر قاسم اور ایک اہلکار زخمی ہو گیا۔
آئی ایس پی آر کے مطابق ایف سی جوانوں کی جانب سے فوری جوابی کارروائی کی گئی جس میں 3 دہشتگرد ہلاک ہو گئے۔ پاک فوج کے شعبہ تعلقات عامہ کے مطابق دہشتگرد حملے میں زخمی ہونے والے ایف سی اہلکاروں کو سی ایم ایچ کوئٹہ منتقل کر دیا گیا ہے۔
وزیر داخلہ شیخ رشید نے لورالائی میں ایف سی کی گاڑی پر دہشتگردوں کی فائرنگ کی شدید مذمت کرتے ہوئے شہید نائیک شریف کے لواحقین سے اظہار تعزیت کیا اور زخمیوں کی جلد صحتیابی کے لیے دعا کی۔