خیبرپختونخوا حکومت نے کفائت شعاری کی جانب بڑا قدم اٹھاتے ہوئے سرکاری خرچ پر ورکشاپس، سیمینار اور بیرون ملک علاج اور نئی گاڑیوں کی خریداری پر پابندی عائد کردی ہے۔ محکمہ خزانہ نے مالیاتی نظم و ضبط سے متعلق تمام محکموں اور اداروں کو مراسلہ ارسال کیا ہے جبکہ اس مالیاتی نظم وضبط کے لیے وضع کردہ رہمنا اصولوں کی منظوری صوبائی کابینہ نے دی ہے۔
مراسلے کے مطابق نئی آسامیوں کے لیے وزیراعلیٰ خیبرپختونخوا کیس ٹو کیس کی بنیاد پر پابندی میں نرمی کر سکتے ہیں۔ مراسلے کے مطابق ایمبولنس، فائرٹرکس، ٹریکٹرز، بسوں اورمشینری کے علاوہ گاڑیوں کی خریداری پر پابندی عائد کی گئی ہے۔
سرکاری خرچے پر ورکشاپس، سیمینارز اور بیرون ملک تربیت میں شرکت پربھی پابندی عائد کردی گئی ہے، صوبائی حکومت کے خرچے پر بیرون ملک علاج پر بھی پاپندی ہوگی۔ مراسلے کے مطابق محکمہ خزانہ کی پیشگی منظوری کے بغیر خالی آسامیوں پر کوئی تقرری نہیں کی جائے گی۔
