اسلام آباد: سپیکر قومی اسمبلی سردار ایاز صادق نے چین کے 77ویں قومی دن پر چینی قیادت اور عوام کو مبارکباد پیش کی ہے۔
اپنے پیغام میں سپیکر قومی اسمبلی نے چینی عوام کی ثابت قدمی، اتحاد اور ناقابلِ تسخیر جذبے کو خراجِ تحسین پیش کیا۔
انہوں نے کہا کہ چینی صدر شی جن پنگ کی قیادت میں چین کی ترقی دنیا کے لیے مثال ہے۔
سردار ایاز صادق نے کہا کہ پاک چین دوستی باہمی اعتماد، احترام اور مشترکہ مفادات پر مبنی ہے۔
دونوں دوست ممالک کے عوام کے دل ایک ساتھ دھڑکتے ہیں۔
سپیکر قومی اسمبلی نے کہا کہ پاکستان اور چین کے درمیان اسٹریٹجک تعاون پر مبنی شراکت داری خطے کے امن، ترقی اور خوشحالی کی ضمانت ہے۔
چین پاکستان اقتصادی راہداری (سی پیک) پاک چین معاشی تعاون کا اہم منصوبہ ہے اور پاکستان اور چین کے درمیان معاشی و تجارتی روابط کے فروغ میں کلیدی کردار ادا کر رہا ہے۔
سردار ایاز صادق نے کہا کہ پاک چین تعلقات پاکستان کی خارجہ پالیسی کا بنیادی ستون ہیں۔
پاکستان کو چین کے ساتھ اپنی مثالی دوستی پر فخر ہے۔
انہوں نے کہا کہ دونوں ممالک کے مابین پارلیمانی رابطوں کا فروغ دوستی کے رشتے کو نئی جہتیں دینے میں کلیدی کردار ادا کر سکتا ہے۔
قومی اسمبلی آف پاکستان نیشنل پیپلز کانگریس چین کے درمیان پارلیمانی تعاون کو مزید مستحکم بنانے کے لیے پرعزم ہے۔
سپیکر قومی اسمبلی نے کہا کہ پاک چین دوستی دونوں ممالک کے عوام کے درمیان مضبوط عوامی روابط کی مظہر ہے۔
