راولپنڈی (لیاقت علی خٹک) میانوالی کے تھانہ مکڑوال کے پہاڑی علاقے ملا خیل میں دہشتگردوں کی موجودگی کی خفیہ اطلاع پر سی ٹی ڈی اور پولیس نے مشترکہ کارروائی کی ہے، کارروائی کے دوران پولیس اور دہشتگردوں کے درمیان شدید فائرنگ کا تبادلہ ہوا۔
ترجمان پنجاب پولیس کے مطابق 10 سے 15 دہشتگردوں کی موجودگی کی اطلاع ملی تھی،جس پر ڈی پی او میانوالی اختر فاروق کی قیادت میں پولیس اور ایلیٹ فورس کی بھاری نفری نے آپریشن کیا۔
ترجمان نے کہا کہ پولیس کی جوابی فائرنگ سے 10 دہشت گرد ہلاک ہوگئے ، جبکہ فائرنگ کے تبادلے میں ڈی پی او میانوالی سمیت پولیس کے تمام افسران و اہلکار محفوظ رہے۔
آئی جی پنجاب ڈاکٹر عثمان انور نے دہشت گردوں کے خلاف کامیاب کارروائی پر ڈی پی او میانوالی اور ٹیم کو شاباش دی اور کہا کہ پنجاب پولیس دہشت گردی کے خلاف الرٹ ہے، دہشت گردوں کے ناپاک عزائم کو خاک میں ملا کر دم لیں گے۔
ڈی پی او میانوالی اختر فاروق کا کہنا تھا کہ میانوالی پولیس امن دشمن عناصر کا اسی طرح جواں مردی سے مقابلہ کرتی رہے گی۔
