راولپنڈی میں جاری تیسرے اور آخری ٹیسٹ میچ کے دوسرے روز کھیل کے اختتام پر انگلینڈ نے دوسری اننگز میں 3 وکٹوں کے نقصان پر 24 رنز بنالیے اور اسے پاکستان کی پہلی اننگز کا خسارہ پورا کرنے کیلئے مزید 53 رنز کی ضرورت ہے۔
قومی ٹیم نے ٹیسٹ کے دوسرے دن اپنی اننگز کو تین وکٹوں کے نقصان پر 73 رنز سے شروع کیا۔ قومی بیٹر سعود شکیل نے اس ٹیسٹ کی پہلی اننگز میں بھی سنچری سکور کی، انہوں نے ٹیسٹ کیریئر کی چوتھی سنچری بنائی۔
قومی ٹیم کےاوپنر بیٹر عبداللہ شفیق 14، صائم ایوب 19، کپتان شان مسعود 26، کامران غلام 3، محمد رضوان 25، سلمان علی آغا ایک ، عامر جمال 14 اور نعمان علی 46 رنز بناکر پویلین لوٹے۔
سعود شکیل نے شاندار کھیل کا مظاہرہ کرتے ہوئے 134 رنز بنا کر آؤٹ ہوگئے، اور پھر پوری ٹیم 344 رنز پر آؤٹ ہوگئی۔
پاکستان نے پہلی اننگز میں 344 رنزبناکر انگلینڈ پر 77 رنز کی برتری حاصل کی۔انگلینڈ کی جانب سے ریحان احمد نے 4 اور شعیب بشیر نے 3 کھلاڑیوں کو آوٹ کیا ۔
پنڈی ٹیسٹ پر پاکستان کی گرفت مضبوط ہوگئی اور دوسرے دن کھیل کے اختتام پر انگلینڈ نے دوسری اننگز میں 3 وکٹوں کے نقصان پر 24 رنز بنائے۔
انگلینڈ کو پاکستان کی پہلی اننگز کا خسارہ پورا کرنے کیلئے مزید 53رنز کی ضرورت ہے اور اُس کی 7 وکٹیں باقی ہیں۔
پاکستان کی جانب سے سپنر نے حریف ٹیم کی ابتدائی 3 وکٹیں حاصل کیں،نعمان علی نے 2 اور ساجد خان نے ایک کھلاڑی کو آؤٹ کیا۔
راولپنڈی میں کھیلے جارہے اس میچ کے پہلے روز انگلینڈ نے ٹاس جیت کر بیٹنگ کا فیصلہ کیا تھا۔دونوں ٹیموں کے درمیان 3 میچوں کی سیریز ایک ایک سے برابر ہے ۔
