اسلام آباد: آرمی چیف جنرل سید عاصم منیر ایئر ہیڈکوارٹر پہنچے جہاں پاک فضائیہ کے سربراہ ائیر چیف مارشل ظہیر احمد بابر سدھو نے ان کا گرم جوشی سے استقبال کیا ۔
آرمی چیف نے چیف آف ائیرسٹاف اور ائیر فورس کے شاہینوں کو بھارتی ائیر فورس کی جارحیت ناکام بنانے اور بھارتی طیارے گرانے پر پاک فضائیہ کو خراج تحسین پیش کیا ۔
آرمی چیف نے پاکستان ائیر فورس کو ایک بار پھر دشمن کے متعدد جہاز مار گرانے اور اپنا لوہا منوانے پر بے حد سراہا، آرمی چیف نے تینوں سروسز کے مابین بہترین تعاون کو بھی سراہا ۔
ملاقات کے دوران اس عزم کو دہرایا گیا کہ کسی کو بھی پاکستان کی جغرافیائی سالمیت کی خلاف ورزی نہیں کرنے دی جائے گی اور جو بھی اس کی کوشش کرے گا اس کی قیمت ادا کرے گا ۔
