کرپٹو کونسل کے سربراہ بلال بن ثاقب نے پاکستان کے پہلے سرکاری حمایت یافتہ بٹ کوائن ریزرو اور قومی بٹ کوائن والٹ کے قیام کا اعلان کر دیا ۔
لاس ویگاس: کرپٹو کونسل کے سربراہ بلال بن ثاقب نے کہا ہے کہ پاکستان نے کرپٹو کو قانونی کرنسی نہ بنانے کا مؤقف تبدیل کرلیا اور امریکا کی پیروی کرتے ہوئے حکومت بِٹ کوائن اسٹریٹیجک ریزرو قائم کررہی ہے ۔
امریکی شہر لاس ویگاس میں بِٹ کوائن کانفرنس سے خطاب کرتے ہوئے بلال بن ثاقب نے کہا کہ پاکستان نےفروری میں غیرملکی سرمایہ کاری کو راغب کرنےکےلیے اور کرپٹو کرنسیوں کےلیے’نیشنل کرپٹو کونسل‘ قائم کی ۔
انہوں نے کہا کہ پاکستان کرپٹو ریگولیٹری پالیسیوں کو اپنا رہا ہے اور جامع ریگولیٹری فریم ورک کی ترقی کےلیے ہی’نیشنل کرپٹو کونسل‘ قائم کی ۔
ان کا کہنا تھا کہ پاکستان نےکرپٹو کو قانونی کرنسی نہ بنانے کا مؤقف تبدیل کر لیا ہے، پاکستان نے بِٹ کوائن اسٹریٹیجک ریزرو کے قیام میں امریکا کی پیروی کی ہے، پاکستان اسٹریٹیجک بِٹ کوائن ریزرو قائم کرنے کے لیے آگے بڑھ رہا ہے ۔
بلال بن ثاقب نےمزید کہا کہ مئی میں بِٹ کوائن کان کنی اور اعلیٰ کارکردگی والےکمپیوٹنگ ڈیٹاسینٹرزکےلیے 2 ہزار میگا واٹ اضافی توانائی مختص کرنےکا اعلان کیا گیا ہے ۔
