راولپنڈی: بانی پی ٹی آئی کے وکیل نعیم حیدر پنجوتھا نے کہا ہے کہ عید سے پہلے بانی تحريک اڼصاف عمران خان کی رہائی کی باتیں جھوٹی ہیں ،بانی نے 3 نکات بھارت کی جارحیت،دہشت گردی اور معاشی معاملات پر مذاکرات کی حامی بھری ہے ۔
انسداد دہشت گردی عدالت میں 9 مئی مقدمات کی سماعت کے بعد میڈیا کے نمائندوں سے بات کرتے ہوئے عمران خان کے وکیل نعیم حیدر پنجوتھا نے کہا کہ ہمارے ایم این اے کو بغیر ثبوت و شواہد اور ہمیں حتمی دلائل دیے بغیر سزا دی گئی ۔
انہوں نے کہا کہ ہمارے 52 ارکان اسمبلی کے خلاف کیسز ہیں، انہیں سزا دینے کی سازش ہورہی ہے، ہمیں انصاف فراہم نہ ہوا تو اس کی ذمہ دار عدلیہ ہوگی ۔
وکیل نعیم حیدر پنجوتھا نے مزید کہا کہ چھبیسویں ترمیم کے بعد اب ہمیں 27 ویں آئینی ترمیم کی دھمکیاں دی جارہی ہیں، ترامیم جتنی مرضی کر لیں، جتنے مرضی ارکان اسمبلی و سینیٹر نااہل قرار دے دیں، ہم نہیں جھکیں گے ۔
انہوں نے مزید بتایا کہ قائد حزب اختلاف کو بھی 62 اور 63 کا نوٹس دے دیا گیا ہے، بانی کی رہائی پر کسی قسم کے کوئی مذاکرات نہیں ہورہے۔ عید سے قبل بانی کی رہائی کی باتیں جھوٹی ہیں، بانی نے حتمی طور پر واضح کر دیا کہ ملک کی خاطر جیل یا پھر بات کرو، ڈیل کسی صورت نہیں ہوگی ۔
