راولپنڈی کی ضلعی انتظامیہ نے شہر بھر میں آج سے 27 جولائی تک دفعہ 144 نافذ کر دی ہے جس کا باقاعدہ نوٹیفکیشن بھی جاری کر دیا گیا ہے ۔
نوٹیفکیشن کے مطابق نالہ لئی اور دیگر آبی گزرگاہوں میں نہانے، تیرنے، پانی میں کھیل کود، اجتماعات اور غیر ضروری نقل و حرکت پر مکمل پابندی عائد کر دی گئی ہے جبکہ نالہ لئی کے قریب غیر ضروری آمد و رفت پر سخت پابندی عائد کی گئی ہے ۔
ڈپٹی کمشنر راولپنڈی نے کہا ہے کہ دفعہ 144 کی خلاف ورزی پر قانونی کارروائی عمل میں لائی جائے گی لہٰذا شہری حفاظتی اقدامات پر سختی سے عمل کریں اور خطرناک موسم کے دوران احتیاط برتیں ۔
انہوں نے تمام سرکاری دفاتر، عدالتوں اور عوامی مقامات پر نوٹیفکیشن کی تشہیر کا حکم بھی جاری کیا ہے تاکہ شہریوں کو بروقت آگاہی دی جا سکے اور کسی بھی ناخوشگوار واقعے سے بچا جا سکے ۔
