مستونگ میں بھارتی سپانسرڈ دہشت گردوں کے سکیورٹی فورسز کی گاڑی پر آئی ای ڈی حملے میں میجر محمد رضوان طاہر سمیت 3 فوجی جوان شہید ہوگئے، آئی ایس پی آر کے مطابق سیکیورٹی فورسز کی جوابی کارروائی میں 4 دہشتگرد ہلاک کردیئے گئے ۔
پاک فوج کے شعبہ تعلقات عامہ کی جانب سے جاری بیان کے مطابق 5 اور 6 اگست کی درمیانی شب بھارتی پراکسی گروپ سے تعلق رکھنے والے دہشت گردوں نے بلوچستان کے ضلع مستونگ میں سیکیورٹی فورسز کی ایک گاڑی کو دیسی ساختہ بارودی سرنگ سے نشانہ بنایا ۔
آئی ایس پی آر کے مطابق دہشت گردوں کے حملے میں میجر محمد رضوان طاہر، نائیک ابنِ امین، لانس نائیک محمد یونس شہید ہو گئے ۔
31 سال کے میجر محمد رضوان طاہر شہید کا تعلق نارووال سے تھا، 37 سال کے شہید نائیک ابنِ امین ضلع صوابی کے رہائشی تھے جبکہ 33 سال کے شہید لانس نائیک محمد یونس کا تعلق ضلع کرک سے تھا ۔
آئی ایس پی آر کا کہنا ہے کہ میجر رضوان شہید ایک دلیر افسر تھے جو دہشتگردی کے خلاف متعدد آپریشنز میں پیش پیش رہے اور ہمیشہ جوانوں کی قیادت فرنٹ لائن سے کی ۔
واقعے کے بعد علاقے میں آپریشن کے دوران سیکیورٹی فورسز نے 4 بھارتی حمایت یافتہ دہشتگردوں کو ہلاک کردیا جبکہ علاقے میں کلیئرنس آپریشن جاری ہے تاکہ کسی بھی ممکنہ دہشت گرد کو ختم کیا جا سکے ۔
