فیلڈ مارشل عاصم منیر اور چین کے وزیر خارجہ وانگ ژی کے درمیان اہم ملاقات ہوئی جس میں چین نے پاکستان کی خودمختاری کے لیے اپنی حمایت جاری رکھنے کے عزم کو دہرا دیا۔
پاک فوج کے شعبہ تعلقات عامہ (آئی ایس پی آر) کے مطابق یہ ملاقات خطے کی سلامتی، دہشت گردی کے خلاف تعاون اور باہمی دلچسپی کے امور پر مرکوز رہی۔ اس موقع پر فریقین نے خطے کی بدلتی ہوئی صورتحال اور اس کے اثرات پر بھی تفصیلی گفتگو کی۔
آئی ایس پی آر کے مطابق چینی وزیر خارجہ وانگ ژی نے پاکستان کی ترقی اور خودمختاری کے لیے مکمل حمایت کی یقین دہانی کرائی۔ انہوں نے کہا کہ دونوں ممالک علاقائی اور عالمی فورمز پر رابطہ کاری مزید بڑھائیں گے تاکہ مشترکہ مقاصد حاصل کیے جا سکیں۔
فیلڈ مارشل عاصم منیر نے چین کی مستقل اور بھرپور حمایت پر شکریہ ادا کرتے ہوئے کہا کہ پاکستان اور چین کی شراکت داری خطے کے امن، استحکام اور خوشحالی کے لیے اہم کردار ادا کرتی ہے۔ اس موقع پر دونوں رہنماؤں نے امن و ترقی کو آگے بڑھانے کے عزم کو ایک بار پھر دہرایا۔
یاد رہے کہ چین کے وزیر خارجہ وانگ ژی نے اس سے ایک روز قبل وزیراعظم شہباز شریف اور وزیر خارجہ اسحاق ڈار سے بھی ملاقاتیں کی تھیں۔ ان ملاقاتوں میں دو طرفہ تجارت اور دیگر اہم امور پر تفصیلی تبادلہ خیال کیا گیا تھا۔
