وزیراعظم شہبازشریف نے غزہ میں جنگ کے خاتمے سے متعلق امریکی صدر ڈونلڈ ٹرمپ کے منصوبے کا خیر مقدم کرتے ہوئے کہا ہے کہ خطے میں فلسطینی عوام اور اسرائیل کے درمیان دیرپا امن سیاسی استحکام کے لیے ضروری ہوگا ۔
اسلام آباد: سماجی روابط کی ویب سائٹ ایکس پر جاری پیغام میں وزیر اعظم شہباز شریف نے کہا کہ صدر ٹرمپ کے غزہ جنگ کے خاتمے کے لیے 20 نکاتی منصوبے کا خیر مقدم کرتا ہوں، خطے میں فلسطینی عوام اور اسرائیل کے درمیان دیرپا امن سیاسی استحکام کے لیے ضروری ہوگا ۔
وزیر اعظم کا کہنا تھا کہ فلسطینی عوام اور اسرائیل کے درمیان دیرپا امن خطے کی معاشی ترقی کے لیے ضروری ہوگا، یقین ہے صدرٹرمپ اس معاملے کو حقیقت میں بدلنے میں مدد کے لیے مکمل تیار ہیں، میں صدر ٹرمپ کی قیادت اور جنگ کے خاتمے کے لیے خصوصی نمائندے کے کردارکو سراہتا ہوں ۔
وزیر اعظم شہباز شریف نے کہا کہ میرا پختہ یقین ہے خطے میں دیرپا امن یقینی بنانے کے لیے دو ریاستی تجویز پر عمل درآمد ضروری ہے ۔
خیال رہے کہ امریکی صدر ڈونلڈ ٹرمپ نے گزشتہ ہفتے اقوام متحدہ کی جنرل اسمبلی کے اجلاس کے موقع پر مسلم ممالک کے سربراہان سے ملاقات کی تھی جس میں انہوں نے غزہ میں جنگ بندی کے حوالے سے منصوبہ پیش کیاتھا ۔
