تھائی لینڈ اور کمبوڈیا کے درمیان جنگ بندی کے معاہدے پر دستخط کے بعد ہفتے کے روز مقامی وقت کے مطابق شام پانچ بجے سے جنگ بندی پر باقاعدہ عمل درآمد شروع کر دیا گیا۔
غیر ملکی خبر رساں ادارے کے مطابق تھائی لینڈ اور کمبوڈیا کے وزرائے دفاع نے مشترکہ اعلامیے میں بتایا کہ معاہدے پر دستخط ہوتے ہی جنگ بندی نافذ العمل ہو گئی ہے۔ اعلامیے کے مطابق دونوں ممالک کی افواج اپنی موجودہ پوزیشنز پر برقرار رہیں گی جبکہ شہری آبادی، سول تنصیبات، انفراسٹرکچر اور فوجی اہداف پر ہر قسم کے حملوں پر پابندی عائد کر دی گئی ہے۔
دونوں فریقین نے فوری جنگ بندی، فوجی نقل و حرکت روکنے اور سرحدی علاقوں کے متاثرہ شہریوں کو اپنے گھروں کو واپس جانے کی اجازت دینے پر اتفاق کیا ہے۔ اس کے علاوہ تخریبی سرگرمیوں اور سائبر جرائم کے خلاف مشترکہ تعاون پر بھی آمادگی ظاہر کی گئی ہے۔
مشترکہ بیان میں مزید کہا گیا ہے کہ جنگ بندی کے 72 گھنٹے مکمل ہونے کے بعد تھائی لینڈ کی تحویل میں موجود کمبوڈیا کے 18 فوجیوں کو رہا کر دیا جائے گا، جو جولائی کے مہینے سے زیر حراست تھے۔
واضح رہے کہ دونوں ممالک کے درمیان گزشتہ 20 روز سے جاری سرحدی کشیدگی کے دوران 100 سے زائد افراد جان سے ہاتھ دھو بیٹھے جبکہ 5 لاکھ سے زیادہ افراد بے گھر ہو چکے ہیں۔ تھائی لینڈ اور کمبوڈیا کے درمیان ایک صدی سے زائد عرصے سے 817 کلومیٹر طویل زمینی سرحد کے مختلف متنازع اور غیر واضح حصوں پر خود مختاری کا تنازع چلا آ رہا ہے۔
