امریکا اور اسرائیل نے مشترکہ طور پر ایران پر حملہ کر دیا ہے۔
ایرانی میڈیا کے مطابق ایران کے دارالحکومت تہران میں تین دھماکوں کی آوازیں سنی گئیں، جب کہ شمالی علاقوں میں مزید دھماکے ممکنہ طور پر میزائل حملوں کے باعث ہوئے۔ تہران کے مشرق میں ایک دھماکا ریکارڈ کیا گیا، جبکہ شمالی علاقوں میں دو مزید دھماکے ہوئے۔ غیر ملکی خبر ایجنسی کے مطابق اسرائیل نے تہران کے مہرآباد ائیرپورٹ کو بھی نشانہ بنایا۔ اصفہان، قم، کرج اور کرمان شاہ میں بھی دھماکے محسوس کیے گئے۔
اسرائیلی دفاعی اہلکاروں کے مطابق ایران پر حملے کا منصوبہ مہینوں پہلے بنایا گیا تھا اور حملے کی تاریخ کا فیصلہ بھی ہفتوں قبل کیا گیا۔ اسرائیلی وزیر دفاع نے بھی ایران پر حملے کی تصدیق کی اور کہا کہ تہران پر پیشگی کارروائی کی گئی تاکہ اسرائیل کے لیے خطرات کم کیے جا سکیں۔
ایرانی میڈیا نے بتایا کہ تہران میں کئی میزائل یونیورسٹی روڈ اور جمہوری ایریا پر گرے، دھویں کے بادل بلند ہوتے دیکھے گئے۔ ایران نے حملے کے بعد اپنی فضائی حدود بند کر دی ہیں، جبکہ عراق نے بھی فضائی ٹریفک روک دیا۔
اسرائیل نے اسکول بند کر دیے، عوام کو گھروں میں رہنے اور عوامی اجتماعات سے گریز کی ہدایات جاری کیں، جبکہ مقبوضہ بیت المقدس میں سائرن بجائے گئے۔
غیر ملکی میڈیا کے مطابق قطر میں امریکی سفارتخانے کے اہلکاروں کو شیلٹر میں جانے کی ہدایت دی گئی ہے اور کئی ممالک نے اپنے شہریوں کو فوری طور پر ایران چھوڑنے کی ہدایات جاری کی ہیں۔
