نئے سال کی آمد کے موقع پر مری میں سیکیورٹی اور نظم و ضبط کو یقینی بنانے کے لیے دفعہ 144 نافذ کر دی گئی ہے۔ انتظامیہ کے مطابق آئندہ دو روز تک مری مال روڈ پر صرف فیملیز کو داخلے کی اجازت ہو گی جبکہ بیچلر ٹورسٹ مال روڈ کے علاوہ دیگر سیاحتی مقامات کا رخ کر سکیں گے۔
ڈی پی او مری کا کہنا ہے کہ یہ اقدام سیاح فیملیز کو پُرامن، محفوظ اور خوشگوار ماحول فراہم کرنے کے لیے کیا گیا ہے تاکہ کسی بھی ناخوشگوار واقعے سے بچا جا سکے۔
پولیس اور ضلعی انتظامیہ کی جانب سے شہر بھر میں سیکیورٹی کے خصوصی انتظامات کیے گئے ہیں اور قانون کی خلاف ورزی پر کارروائی عمل میں لائی جائے گی۔
دوسری جانب ملکہ کوہسار مری اس وقت گہرے بادلوں کی لپیٹ میں ہے اور نئے سال کی خوشیاں منانے کے لیے سیاحوں کی بڑی تعداد مری اور گلیات کا رخ کر رہی ہے۔
محکمہ موسمیات کے مطابق آج سے 2 جنوری تک بارش اور برف باری کا امکان ہے، جس کے باعث سردی کی شدت میں مزید اضافہ ہو سکتا ہے۔
متوقع برف باری کے پیش نظر محکمہ ہائی وے پنجاب نے مری اور گلیات میں الرٹ جاری کر دیا ہے۔
صوبائی وزیر ملک صہیب احمد بھرتھ نے ہدایات جاری کرتے ہوئے کہا ہے کہ برف ہٹانے والی مشینری ہمہ وقت فعال رکھی جائے، اہم شاہراہوں کو کھلا رکھا جائے اور سیاحوں کو کسی قسم کی دشواری کا سامنا نہ ہو۔
انتظامیہ نے سیاحوں سے اپیل کی ہے کہ وہ موسم اور سیکیورٹی صورتحال کو مدنظر رکھتے ہوئے سفر کریں، ٹریفک قوانین پر عمل کریں اور انتظامیہ سے تعاون کریں تاکہ نئے سال کی تقریبات خوشگوار اور محفوظ رہیں۔
