پاکستان اسٹاک ایکسچینج میں منفی رجحان کا سلسلہ مسلسل تیسرے روز بھی جاری رہا، جہاں کاروباری ہفتے کے دوران شدید مندی دیکھنے میں آئی۔
کاروبار کے اختتام پر کے ایس ای 100 انڈیکس 1632 پوائنٹس کی کمی کے بعد نمایاں گراوٹ کا شکار رہا، جس کے باعث سرمایہ کاروں کو اربوں روپے کا نقصان برداشت کرنا پڑا۔ مارکیٹ میں ابتدائی سیشن سے ہی فروخت کا دباؤ دیکھا گیا جو اختتام تک برقرار رہا۔
مارکیٹ ماہرین کے مطابق سرمایہ کاروں میں غیر یقینی صورتحال اور معاشی خدشات کے باعث محتاط رویہ پایا جا رہا ہے، جس کے نتیجے میں شیئرز کی فروخت میں اضافہ ہوا اور انڈیکس نیچے آیا۔
دوسری جانب کرنسی مارکیٹ میں معمولی بہتری دیکھنے میں آئی۔ انٹربینک میں امریکی ڈالر 2 پیسے سستا ہو کر 279 روپے 53 پیسے کی سطح پر بند ہوا۔ ماہرین کا کہنا ہے کہ ڈالر کی قدر میں یہ کمی معمولی ہے تاہم زرمبادلہ مارکیٹ میں استحکام کی کوششوں کا تسلسل ظاہر کرتی ہے۔
