پاکستان الیکٹرانک میڈیا ریگولیٹری اتھارٹی (پیمرا) نے تمام سیٹلائٹ ٹی وی چینل لایسنس ہولڈرز کو اپ لنکنگ سگنلز میں مداخلت کے خلاف حفاظتی اقدامات سے متعلق ہدایات جاری کر دی ۔
اسلام آباد: یہ نوٹس حالیہ واقعات کے پس منظر میں جاری کیا گیا ہے جس میں چند روز قبل کچھ چینلز کو ٹرانسمیشن انٹرفیئرنس کا سامنا کرنا پڑا تھا ۔
پیمرا نے تمام لایسنس ہولڈرز کو ہدایت کی ہے کہ وہ اپنے اپ لنک فیسیلٹیز، انکرپشن پروٹوکولز، مانیٹرنگ اور انٹروژن ڈیٹیکشن سسٹمز کو مضبوط کریں اور 24 گھنٹے دستیاب ایمرجنسی کانٹیکٹ پرسنز کی تفصیلات فوری طور پر اتھارٹی کو جمع کرائیں تاکہ مستقبل میں کسی بھی سائبر حملے یا غیر مجاز سگنل انجیکشن سے نمٹا جا سکے ۔
اس نوٹس سے ایک روز قبل 12 مارچ 2026 کو رات 10 بجے خیبر نیٹ ورک سائبر حملہ کی زد میں آیا تھا، افغانستان میں مقیم ہیکرز نے اپنے بھارتی سہولت کاروں کے ساتھ مل کر خیبر نیٹ ورک کی لائیو نشریات کو ڈسٹرب کرنے کی کوشش کی ۔
تاہم پیمرا، پاک سیٹ اور دیگر ریاستی اداروں کی فوری اور مربوط کارروائی کے نتیجے میں یہ سازش ناکام بنا دی گئی ، خیبر نیٹ ورک کی ٹیکنیکل ٹیم اور متعلقہ اداروں کے درمیان مسلسل رابطے سے نشریات میں کوئی رکاوٹ نہیں آئی ۔
خیبر نیٹ ورک نے بیان جاری کرتے ہوئے پیمرا آرڈیننس 2002، میڈیا کنٹنٹ ریگولیشنز اور پریونشن آف الیکٹرانک کرائمز ایکٹ (پیکا) 2016 کی مکمل پابندی کا اعادہ کیا اور اپنے جدید سیکیورٹی سسٹمز کو اس کامیابی کا کریڈٹ دیا ۔
نیٹ ورک نے تمام ریاستی اداروں بالخصوص پیمرا اور سیکیورٹی اداروں کا شکریہ ادا کیا اور عوام کو یقین دلایا کہ قومی سلامتی اور معتبر معلومات کی فراہمی کسی بھی صورت میں متاثر نہیں ہوگی ۔
