خیبر پختونخوا حکومت کے رمضان ریلیف پیکج کے تحت اب تک 7 لاکھ 16 ہزار افراد کو امداد فراہم کی جا چکی ہے، جو مجموعی ہدف کا تقریباً 71 فیصد بنتا ہے۔
صوبائی مشیر خزانہ مزمل اسلم کے مطابق حکومت نے رمضان پیکج کے تحت مجموعی طور پر 10 لاکھ 15 ہزار 455 افراد تک امداد پہنچانے کا ہدف مقرر کیا ہے۔ ان کا کہنا ہے کہ اب تک 7 لاکھ 16 ہزار مستحقین کو پیکج دیا جا چکا ہے۔
انہوں نے بتایا کہ اب بھی 2 لاکھ 98 ہزار 496 افراد ایسے ہیں جنہیں تاحال رمضان پیکج فراہم نہیں کیا جا سکا۔
دوسری جانب رمضان پیکج کی تقسیم کے طریقہ کار پر تنقید بھی سامنے آ رہی ہے۔ ذرائع کے مطابق امدادی پیکج کی تقسیم پی ٹی آئی کے قومی و صوبائی اسمبلی کے ارکان، عام انتخابات میں ناکام امیدواروں اور پارٹی عہدیداروں کے ذریعے کی جا رہی ہے، جس پر اقربا پروری کے الزامات لگائے جا رہے ہیں۔
صوبائی حکومت کے اس رمضان پیکج پر مختلف حلقوں کی جانب سے سخت تنقید کی جا رہی ہے اور شفافیت سے متعلق سوالات بھی اٹھائے جا رہے ہیں۔
