تہران: ایران میں پاکستان کے سفیر مدثر ٹیپو نے کہا ہے کہ حکومتِ ایران نے مشکل حالات کے باوجود پاکستان کے ساتھ تجارت اور ٹرانزٹ تجارت کے لیے بھرپور سہولتیں فراہم کی ہیں، جس پر پاکستان شکر گزار ہے۔
اپنے بیان میں مدثر ٹیپو کا کہنا تھا کہ ایران نے نہ صرف دوطرفہ تجارت کو جاری رکھنے میں مدد دی بلکہ اپنے راستے سے ٹرانزٹ تجارت کے لیے بھی مکمل تعاون فراہم کیا۔
انہوں نے بتایا کہ پاکستان اور ایران کے درمیان زمینی سرحدیں معمول کے مطابق کھلی ہیں اور تجارتی سرگرمیاں بلا تعطل جاری ہیں۔ سرحدی مقامات پر گرین چینلز بھی فعال ہیں، جس سے دونوں ممالک کے درمیان اشیاء کی ترسیل تیز اور آسان ہو گئی ہے۔
سفیر کا مزید کہنا تھا کہ پاکستان بھی ایران کے ساتھ مکمل تعاون کر رہا ہے تاکہ موجودہ صورتحال کے باوجود تجارتی روابط متاثر نہ ہوں۔ دونوں ممالک باہمی کوششوں سے تجارتی دباؤ اور دیگر مسائل کو حل کر رہے ہیں۔
انہوں نے کہا کہ ایرانی دارالحکومت میں پاکستانی سفارتخانہ مسلسل حکومتی اور نجی شعبے کے متعلقہ فریقین سے رابطے میں ہے تاکہ تجارت کے تسلسل کو یقینی بنایا جا سکے۔
