پشاور: ایچ بی ایل پاکستان سپر لیگ (پی ایس ایل) 2026 کی آفیشل ٹرافی بدھ کے روز پشاور میں خیبر ٹی وی کی سکرین پر پہلی مرتبہ پیش کی گئی، دنیا بھر کے ناظرین نے ٹرافی کو اے وی ٹی خیبر کی خصوصی رمضان ٹرانسمیشن "لبیک یا رمضان” کے دوران براہِ راست دیکھا۔
یہ دوسرا سال ہے کہ پی ایس ایل کی ٹرافی خیبر نیٹ ورک کی سکرین پر جلو گر ہوئی ہے۔ گزشتہ سال بھی پی ایس ایل 10 کے موقع پر اسی نوعیت کی تقریب منعقد کی گئی تھی۔
ایک گھنٹے پر مشتمل براہِ راست پروگرام میں ٹرافی کو اسٹوڈیو میں نمایاں جگہ پر رکھا گیا تاکہ ناظرین ٹرافی کا مکمل نظارہ کر سکیں۔ پروگرام کے دوران ٹرافی کو مختلف زاویوں سے دکھایا گیا اور اسے مرکزی توجہ حاصل رہی۔
تقریب میں معروف موسیقار فرحان بوگرا (خماریاں بینڈ) اور جنید کامران صدیقی (جام بوائز) نے پشاور زلمی کے لیے پی ایس ایل 2026 کا نیا ترانہ بھی پیش کیا۔ پروگرام کی میزبانی ذکی الرحمان نے کی۔
ناظرین نے اے وی ٹی خیبر کے ذریعے گھروں میں بیٹھ کر ٹرافی کا مشاہدہ کیا، جبکہ نیا ترانہ آئندہ سیزن سے قبل شائقین کے جذبے کو بڑھانے کا ذریعہ بنے گا۔
