پاکستان کے خلاف سوشل میڈیا پر منظم ڈس انفارمیشن مہم چلائے جانے کا انکشاف ہوا ہے، جس میں بھارت کے ساتھ افغانستان کے بعض نیٹ ورکس کے ملوث ہونے کی نشاندہی کی گئی ہے۔
سکیورٹی ذرائع کے مطابق پاکستان کے بارے میں منفی تاثر پھیلانے کے لیے جعلی سوشل میڈیا اکاؤنٹس کا استعمال کیا جا رہا ہے، اور دونوں ممالک کی جانب سے مل کر اسٹریٹجک نوعیت کے ڈس انفارمیشن حملے کیے جا رہے ہیں۔ ذرائع کا کہنا ہے کہ ایرانی شناخت کے حامل درجنوں اکاؤنٹس بھارت اور افغانستان سے آپریٹ کیے جا رہے ہیں، جبکہ ایران کے نام پر پاکستان کے خلاف منظم پروپیگنڈا کیا جا رہا ہے۔
رپورٹس کے مطابق ڈس انفارمیشن مہم کا آغاز بعض گھوسٹ ایکس اکاؤنٹس جیسے آئی این این ایران نیوز اور ایران ٹی وی سے کیا گیا، جن کے ذریعے پاکستان کے خلاف مصنوعی ردعمل پیدا کر کے اسے مزید پھیلایا گیا۔ افغانستان سے چلنے والے اکاؤنٹس اس مواد کو آگے بڑھانے میں کردار ادا کر رہے ہیں۔
ذرائع کے مطابق پاکستان پر امریکا کے لیے تیل ترسیل جیسے بے بنیاد الزامات لگا کر نفرت انگیز پروپیگنڈے کو تقویت دی گئی، جس کا مقصد پاکستان کو عالمی سطح پر متنازع بنانا اور اس کے امن کے لیے کردار کو نقصان پہنچانا ہے۔
مزید کہا گیا ہے کہ گھوسٹ سوشل میڈیا اکاؤنٹس کے ذریعے پاکستان کو ایران مخالف اور مغربی ایجنڈے کا حصہ ظاہر کرنے کی کوشش کی جا رہی ہے۔ یہ ڈس انفارمیشن مہم نہ صرف پاکستان بلکہ عالمِ اسلام میں بداعتمادی اور تقسیم پیدا کرنے کا خطرناک منصوبہ قرار دی جا رہی ہے۔
