اسلام آباد میں مشرقِ وسطیٰ کی موجودہ کشیدہ صورتحال کے تناظر میں اہم سفارتی سرگرمیاں جاری ہیں، جہاں مصر، ترکی اور سعودی عرب کے وزرائے خارجہ امن کے قیام اور جاری تنازعات کے حل کیلئے مشاورت کر رہے ہیں۔
مصر کے وزیر خارجہ بدر عبد العاطی نے دفترِ خارجہ کا دورہ کیا، جہاں پاکستان کے وزیر خارجہ اسحاق ڈار نے ان کا پرتپاک استقبال کیا۔ ملاقات کے دوران دونوں رہنماؤں کے درمیان دوطرفہ تعلقات، علاقائی صورتحال اور باہمی دلچسپی کے مختلف امور پر تفصیلی تبادلہ خیال کیا گیا۔
دریں اثنا، ترکی کے وزیر خارجہ خاقان فیدان بھی اسلام آباد میں موجود ہیں اور وہ جاری سفارتی مذاکرات کا حصہ بن رہے ہیں۔ ذرائع کے مطابق، سعودی عرب کے وزیر خارجہ فیصل بن فرحان بھی ان اہم مذاکرات میں شریک ہوں گے۔
یہ سفارتی کوششیں ایک ایسے وقت میں کی جا رہی ہیں جب مشرقِ وسطیٰ میں عدم استحکام بڑھ رہا ہے اور عالمی برادری خطے میں امن و استحکام کے لیے مشترکہ حکمت عملی کی تلاش میں ہے۔
