پاکستانی بندرگاہیں ٹرانس شپمنٹ مرکز کے طور پر اپنی پوزیشن مضبوط کر رہی ہیں، وفاقی وزیر بحری امور محمد جنید انوار چوہدری

وزیر بحری امور محمد جنید انوار چوہدری نے کہا ہے کہ پاکستانی بندرگاہیں ٹرانس شپمنٹ مرکز کے طور پر اپنی پوزیشن مضبوط کر رہی ہیں۔ ان کا کہنا تھا کہ ڈی پی ورلڈ چنئی جہاز مزید ٹرانس شپمنٹ کارگو لے کر کراچی پورٹ پہنچ گیا ہے۔
انہوں نے بتایا کہ موجودہ صورتحال میں پورٹ قاسم پر ٹرانس شپمنٹ آپریشنز میں تیزی آئی ہے اور دو جہازوں کے ذریعے مجموعی طور پر 3 ہزار 485 ٹی ای یوز ٹرانس شپمنٹ کارگو ہینڈل کیا گیا۔ کنٹینر جہاز ناردرن گارڈ کے ذریعے 3 ہزار 180 ٹی ای یوز جبکہ ناگویا ایکسپریس سے مزید 305 ٹی ای یوز کارگو پراسیس کیا گیا۔
وزیر بحری امور کے مطابق پورٹ قاسم پر درآمدات 21 ہزار 537 ٹی ای یوز اور برآمدات 29 ہزار 467 ٹی ای یوز رہیں، جبکہ ٹرانس شپمنٹ کے لیے بندرگاہ کی مجموعی گنجائش 13 ہزار 100 ٹی ای یوز ہے۔ انہوں نے مزید کہا کہ ٹرانس شپمنٹ کارگو پر زیرو وارفج اور دیگر چارجز میں نمایاں کمی کی گئی ہے جس سے بندرگاہی سرگرمیوں میں اضافہ متوقع ہے۔